लमजुङ । चर्चित फुटबलर सावित्रा भण्डारीको नाममा साम्बा चोक नामाकरण गरिएको छ । महिला फुटबल टोलीकी खेलाडी सावित्रा भण्डारीको सम्मानमा मस्र्याङ्दी गाउँपालिका–९ खुदीपुल वारिको क्षेत्रलाई ‘साम्बा चोक’ नामाकरण गरिएको हो ।
गाउँपालिका अध्यक्ष अर्जुन गुरुङले साम्बाको तस्बिर राख्दै त्यस क्षेत्रलाई साम्बा चोक नामाकरण रहने घोषणा गरे । सावित्रा फुटबल खेलको क्षेत्रबाट पालिका, जिल्ला मात्र नभई नेपाललाई विश्वसामु चिनाउन सफल भएकाले पालिकावासी हर्षित रहेको उनले बताए । स्थानीय भएकाले सम्मान स्वरुप यो नामाकरण गरिएको उनको भनाइ थियो । आफूहरुको यो सम्मानले सावित्रालाई अझै अगाडि बढ्न प्रेरणा मिल्ने र फुटबल क्षेत्रमा स्थापित हुन उनलाई थप उर्जा मिल्ने पालिका अध्यक्ष गुरुङले बताए ।
यसैगरी, प्रमुख जिल्ला अधिकारी माधवप्रसाद पोखरेलले सावित्राजस्तो व्यक्तिका नाममा चोकको नामाकरण हुँदा उनको योगदानको कदर भएको र जिल्लावासीका लागि पनि गौरवको कुरा भएको बताए । उनले साम्बाको जीवन अगाडि बढाउन सशस्त्रले पनि केही भूमिका खेलको बताए ।
यस्तै साम्बाको बुबा थमनबहादुर भण्डारीले आफ्नो छोरीको नाममा चोकको नामाकरण हुँदा धेरै खुसी लागेको बताए । फुटबल क्षेत्रमा योगदान गर्दै नेपाललाई नै चिनाउने काम गरिरहेको र यस्ता सम्मान कार्यले छोरीलाई अझै अगाडि बढाउन हौसला मिल्ने उनको भनाइ छ ।
